Acts 5

Ananiasi Ilee Semau Sapila

1Ioxe, itema vile ualasou lexe Ananiasi muxolu no taiine'i. Ia semau ne, ualasie lexe Sapila. Ane'i kalumo mi'italonu liaxa'a vile sou ta mitema milotonu. 2 ^aIa anu mutalumeu lamolisou lia ne pa'usou lexe anu na'u. La semau kalumo ne, milavusou aloxo ne. Ia anu mune'enu lamoli pa'usousi sou mu'italonu no talaxa'a ta aposeli.

3 ^bLa Pita mutali'isou aloxo 'o, “Ananiasi, loxovaa ane nini nemalanixu Satani sou musaxila'ine, la sou nini nekalavoinu Uleenu Tavuna mo netalumeu lamolisou liaxene pa'usou sou lexe na'a nini 'o? 4Nini nelavu lexe ta mitema iloto liaxene uao, la liaxene ne nini na'aninisi. Xe ili'i no mine ta mitema milotonu mukalu xe neno'u lamolisou mukalu, la nini na'aninisi. Ia mii ma'ia mu'oxoneni, la sou ne'oxonu 'ilixo masua ane 'o? Nini ne'oxo loloxa'a ta mitema uasi, ia ne'oxo loloxu Lataua!”

5Xe Ananiasi mulomusou aloxo ne, la anu mulapau mulu'esi mole musoli avile. Xe ta mitema milomusou a'alosou mii ane muxali noxou Ananiasi ne, la ane'i mukalusi mimama'u manina. 6Musoli mukalu, la ta maulisi'a mine'e miluvonu vasimolu ka mitavulenu milaixu no ale sou mi'asixu.

7Xe ili'i maxuveeni sevile, la semau kalumo mine'e mi'una no tani ane ane'i mipita no anu ne. Ia ilavusou mii ma'ia ane muxali noxou mulue ne uasi. 8La Pita mutali'isie aloxo 'o, “Navikalaleli. Lamolisou liangenge nongou mulumeni Ananiasi ne, anu ase 'osi?”

La ane mikolinu tali'i noxou aloxo 'o, “Ani, anu aloxo nesi.”

9La sou Pita muvikala aloxo 'o la, “Loxovaa ane ngingi nongou mulumeni ngepita xavutalamengi sou ngetovo Uleenu Tavuna noxou Tila 'o? Namalei, ta mitema ane mi'asixu mulumeni ane'i a ixali itulu no ale no aitenga ne, mo maasi 'o la ane'i itavuleneni ilaixine no ale kalumo.”

10Pita muvikala aloxo ne mukalu, la sema ne misoli avile mole milapau milu'e no tava'u. Xe ta maulusi'a mi'una la mimaisie no mine misoli miai, la sou ane'i mitavulene milaixe no ale sou mi'asixe noxou mulue pa'umolu. 11La ta mitema mukalusi noxou Lataua mo ane'i ane milomusou a'alosi'a ilou ne, mimama'u manina.

Ta Mitema Tavu'alo Mimauli

12 ^cXe ta aposeli ne, miavuti la mi'oxonu sosovo iouiou mo mii ane ta mitema imaisou la tane'i liliiou no taiine'i ta mitema. Xe ane'i mukalusi ane mimulaxu tane'i noxou Iesu milavusou sou mine'e mipita no Matavala noxou Solomoni. 13Ta mitema ane va'ava'axu ne mimaisi'a la mi'iti ualasi'asi, ia ine'e ipita noxi'a uasi xo ane'i mimama'u. 14Io, ta mitema ta mulu xe ta sema tavu'alo ne mimulaxu tane'i noxou Tila mole 'iti'itisi'a ne musuku mutelai. 15Ta mitema mimaisi'a ta aposeli mi'oxonu sosovo iouiou, la sou ta mitema mine'ene'i ane'i ane mipipiena sou misia'u luuluusi'a xe mo'emo'esi'a no vote'i pa'umolu no mine Pita umuamua'i uvaxa une'e no anu. Mo sou lexe Pita xalexu ulaisi'a se'i, la ane'i laixene'i. 16Mo ta mitema tapiena kalumo me'a no tuatuala ane 'alai ne Ielusalemu ne mine'e. La mitavulene'i ane'i ane mipipiena ilo'a ane'i ane ta uleenu ta masumasua mi'oxo masuane'i ne, mine'ene'i la ane'i mipamuine'i mukalusi.

Ta Tatila sou Ivelunu Vaivaikala Mi'oxo Masuane'i ta Aposeli

17Io kisi'a ta aili'i ilo'a ta menexu mukalusi ane'i ane muxolu no anu la'oluxa'a ta Sadokaio ne misangalakone'i manina, 18la sou ane'i mitetelisi'a ta aposeli, mo mitatuxa'a no nano no taasou navunavu. 19 ^dIa no anu 'olovoxo, la angelo noxou Tila mukisiinu aitengaxu taasou navunavu, la mulalixa'a milai no ale, io muvikala aloxo 'o, 20“Ngalai, ngatulu no nano no anu taasou lalotu tatila noxou Lataua, mo ngaa'aloi'a ta mitema no anu vaivaikala sou mauli ane alavua 'o ukalusi.”

21Ia no mine lamana upau 'o, la ane'i mi'una no anu taasou lalotu tatila noxou Lataua loxo milomusou angelo muvikalane'i, mo misokou sou milosi'a ta mitema lavulavu. Xe no mine kisi'a ta aili'i ilo'a ta menexu mixali, la ane'i mi'avali'a ta tatila sou itilovosou vaivaikala xe ta tatilasi'a ta Isilaeli mukalusi sou mine'e mipita, la mikalaa anaxa'ai'a ta aposeli no taasou navunavu, sou ino'a ta aposeli ine'e noxi'a. 22Ia no mine ane'i mixali no anu taasou navunavu, la ta tatila sou xaixai noxi'a ne ixalisi'a ia ta aposeli ne ixolu uasi. La sou ane'i milivu milai sou mia'alo lexe, 23“Nexi temaisou taasou navunavu ne mitatusou laixe mo ta mitema sou isaxila'u ne mitulutulu no aitenga, ia no mine nexi tekisiinu aitenga, la taxalisou itema vile no nano uasi.” 24Xe no mine milomusou a'alo aloxo ne, la tila noxi'a ta mitema sou isaxila'u taasou lalotu tatila noxou Lataua mo ta tatilasi'a ta aili'i ne tane'i lili xe mixavutala piena lexe mii ane ne muxali a loxovaa.

25La itema vile mune'e sou muvikala lexe, “Ngalomu, ta mitema ane ngingi ngetatuxa'a no taasou navunavu ne ane'i a itutulu no nano no anu taasou lalotu tatila noxou Lataua mo a ilosi'a ta mitema lavulavu.” 26Aloxo ne, la tila noxi'a ta mitema sou isaxila'u taasou lalotu tatila noxou Lataua ilo'a ta tatila sou xaixai noxou milai sou mine'ene'i ta aposeli. Ia ane'i i'oxo masuane'i uasi. Xo ane'i mi'ume lexe loxo 'o io ta mitema ive'a no anu lavo'o.

27Ane'i mine'ene'i ta aposeli, la mine'e mitulusi'a no ie'i ta mitema ane ipita sou ilomusou xe ivelunu vaivaikala. La kisi'a ta aili'i mutalisi'a aloxo 'o, 28 ^e “Nexi tevikalangengi pekia'u lexe mamu sou ngalosi'a ta mitema lavulavu no anu uala ane ne. Ia ngingi ngelosi'a ta mitema mukalusi ne Ielusalemu ne lavulavu noxinge, mo ngingi nga'oxo lexe ngatelonu vaikala sou susu sou sialuxu itema ne noxixe.”

29 ^fLa Pita mo ta aposeli mose'i la ne mikoline'i ta aili'i ne aloxo 'o, “Nexi temulinu vaikala noxou Lataua, ia tamulinu vaikala noxi'a ta mitema uasi. 30Lataua noxi'a ta xaixasixe mutulusou Iesu no anu soli e ngingi ngevau la ngelilinoxu no anu ovu valautu. 31 ^gIo Lataua mutelaixu la muxolu no avolu tema sou muxali loxo tatananu tuala 'Olu mo mitema sou pamauli sou lexe usuuline'i ta Isilaeli sou ixiu opone'i mo Anu uxiunu tumalouu 'ilixo masumasua noxi'a. 32La sou nexi ne ta mitema sou a'alosou mimii ane ne. Mo Uleenu Tavuna kalumo ane Lataua mulosi'a ane'i ane milomuxu vaikala noxou ne Anu kalumo mitema sou a'alosou mimii ane ne.”

33Xe no mine ane'i milomu aloxo ne, la ane'i laiaxa'a masua mo mimasaxa lexe ive'a isoisoli. 34Ia Palisaio vile ualasou lexe Xamalieli anu itema sou lavulavu no anu lapuloto mo ta mitema mukalusi ne itoxonu. Anu muavuti mutulu no nano no anu pitapita ne la muvikala pekia'u lexe ilaixa'a ta aposeli ne no ale sevile 'o. 35Ka sou anu muvikalane'i ta mitema ane mipita ne aloxo 'o, “Ta mitema sie Isilaeli, ngaxavutala laixe no anu mii ma'ia ane ngingi ngamasaxa lexe nga'oxonu noxi'a ta mitema ane 'o. 36 ^hXo taalu se 'o, la Tiudasi muxali muvikala lexe anu itema tila. La sou ta mitema itemaxu itemaxu vile (400) mimulinu. Ia ta mitema mivau musoli, la ta mitema mukalusi ane mimulinu ne mipaxele mole xaixai noxou ne tasiauxu vitanisi. 37Xe ili'i noxou, la Iudasi ane sie Xalilaia ne mupalaa no anu voxo sou 'iti'itisi'a ta mitema, la mulapunu xavutalai'a ta mitema tavu'alo sou lexe i'oto sou ixexeenu itema sou usaxila'u lialia ne Xalilaia. Ia anu kalumo ne ta mitema mivau musoli la ane'i mukalusi ane mimulinu kalumo ne ane'i mipaxele mole milailai. 38Aloxo ne la sou, no anu mii ane vaimomo 'o ne, eni apeletotosinge lexe ngaxexesi'a ta mitema ane ne mo ngamalanixi'a ilai. Xo lexe xavutalai'a mo xaixai noxi'a ne molu noxi'a ta mitemasi la anu xaixai ne tasiau mo ukalu. 39Ia lexe anu molu noxou Lataua, la ngingi ne umomomo sou ngatalosi'a ta mitema ane ne uasi. Ia ngingi ne loxo nga'oto'otoxu Latauasi.”

40 ⁱVaivaikala noxou ne mulapunu xavutalai'a, la sou ane'i mi'avali'a ta aposeli mi'una mo mipuapuasi'a. Mukalu la ane'i mivikalane'i pekia'u lexe ia'alo no anu Iesu ualasou mamu. Io mimalanixi'a milai. 41 ^jLa ta aposeli mixexee no anu pitapita ne, io milai la mi'osa xo Lataua mulavusi'a mo muxavutala lexe ane'i imomomo sou itavulenu maela no anu ualasou Iesu. 42Voxovoxo utotomu ne, ane'i ipitapita no taasou lalotu tatila noxou Lataua mo ta taasi'a ta mitema, ia ane'i italo uasi sou ilosi'a ta mitema lavulavu mo mia'alo a'alo laixe lexe Iesu ne Anu Kalisito.